بقلم الشاعر 👈 مبروك البنا

 **** مراسيـل

ــــــــــــــــــــ

يـا قلبي غـاب اللي تــوده

وغلبت أبعت له مراسيـل

سلامي مش راضي يرده

ونظرة عِنيه لعنيَّـه تميـل

البسمـه منـه تــرد الروح

لكنهـا حـسـب الـتسـاهيل

قلبي علي بعـاده مهمــوم

والدمع نـازل زي السيـل

قلبي علي الصبر ملـزُوم

مهما ظلمنا وفاض الكيل

بحُسن ودلال يلعـب بيـنا

والجرّي وراه بيهد الحيل

عـن حِـلّـمـنا و بعــد بيـنا

وعن طريـق الحـق يميل

على فين واخدانا خطوينا

نهـاري ضلمه زي الليـل

يـا اللي سـاكن جـوه مني

مش كـلام ولا لـك بـديـل

بالأمانه من غيـرما اغني

انـت قـلبي وما لـك مثيـل

كتيـر وياما جريت ورايا

مشينا بحُب طريق طويل

إزاي قَـدرت تبيـع هـوايا

ازاي تِخـلِّـي الجنـه ويـل

بكفيـــــاك جـروح كفـايه

كُـل واحـد ولُــه سـبـيــل

روح معـاك الدُنــيا غـايه

ورُد علي قلبي المراسيل

ـــــــــ[مبروك البنا]ـــــــ