بقلم الشاعر👈كارم محمود والي
إيد واحدة
ملامحِك ليه فيها خضوع
وصورتِك ليه عليها رتوش
وصوتِك ليه ماهوش مسموع
ولو عالي......مابنسمعهوش ؟؟؟!!
وبحرِك.... هادية أمواجه
وأسماكِك....بلعتها قروش
وراسمة ليه علي جبينك
غزالة بتفترسها وحوش ؟؟!!
طب ليه الفُرقة كسرتنا
وخذلتنا
وفين راحت عزوتنا ولمتنا
ووحدتنا ؟؟
ولا إحنا عبيد مانستهلوش ؟؟
دا رب الكون وصانا
نكون دايما إيد واحدة
ورسولنا قال دي أمانة
وقال أحاديث عن الوحدة
وكل مداح في الهوي
قال عنها كلام منقوش
بدون الوحدة نتشتت
وقوِتنا....حاتتفتت
وبعد ماكنا جبل راسخ
حانتكسر من قَرص هاموش
وحتلاقي واحد تافه
بيتطاول..وبيحاول
يدمرنا...ماهو عارف
إن عنينا مابتشفهوش
عايزين نرجًع اللي راح
عايزين قلوبنا علي بعضنا
ماتيجي..ننسي الجراح
ونحاول نحقق حلمنا
تبقي القوة لينا دليل
ومش حانعرف مستحيل
يمكن نرجًع....حقنا
أكيد حايرجع حقنا
بالإخلاص والتحدي
إن شاء الله راح نعدي
ماهو أصل جدك وجدي
بالهوان والخضوع
كانو أبدا....مايرضوش
مايرضوش
كارم محمود والي
مصر
إسكندرية
تعليقات
إرسال تعليق