بقلم الشاعر 🟢🟡 بلشقر محمد 🟢🟡 طار نعاسي🟢🟡
😦طار نعاسي😦
البلاد كلها مآسي
بغيت نرجع لبلاد جدودي
نعيش مع ناسي
في وسط العراصي
ناكل من غلة الجنان
ونشرب من الحاسي
مليت الكلام الراشي
ما بقي نعمر به راسي
من ضريبة النضال
حاكموني وتابعوني وسموني
ومزال كنقاسي
بالهم فاض كاسي
حبيت نرجع لبلادي
ننقش أرض بوي بفاسي
نحوض على غراسي
باش نعي ويرجع نعاسي
نرجع ذاكرة جدودي اللي قاوموا
واخ تاريخهم حرفوه أصحاب الحال
راه شيخ القبيلة ما ناسي
على ضوء تاريخهم بنيت ساسي
بغيت نبعد من الجالسين على الكراسي
سياستهم كلها شر
راه حرقولي راسي
*******
نبعدهم نعيش بالزيت وخبز الشعير
ونشرب من ماء الغدير
ونسالي من السهير
ونعيش في البادية
بلاد الخير والخمير
نمشي برجلي حافي
ننسى نار الهم والعوافي
نشعل القنديل اللي كان طافي
على ضوو نكتب ونشعر ونعبر
على هذاك اللي طغا وتجبر
اللي ما بقى عندو إحساس
اسجن اولاد الشعب في القفاص
هرس اقتصاد البلاد تهراس
هرب الذهب وصبغو بالنحاس
اجمع لحصيصة على ظهر الناس
خلى المتقاعد شيفور في الطاكسي
وفي باب العمارة عساس
وفيق أخوي
ما تبقى حاني الراس
راه عيينا وصبرنا ما فيه القياس
باركة خلاص
الله يحد البأس.
مجدوب الحرف : بلشقر محمد.
تعليقات
إرسال تعليق