بقلم الشاعر 🎋🎋 بلشقر محمد 🎋🎋 عبادين الدرهم 🎋🎋
💰 عبادين الدرهم 💰
إنسان گاع مايخمم
ولعقله يخدم
يبيع شرفه بدرهم
ويعيش حياته في الهم
بدرهم
الفاسد فيه يتحكم
بدرهم
يظلم خوه وما يحشم
بدرهم
شحال تباع من قلم
يشهد الزور بدرهم
إنسان مذلول ومازال يفهم
صنطيحة ما يخاف ما يحشم
مستواه ضعيف مين يتكلم
💰💰💰
ياعباد الدرهم
راه يجي الوقت اللي تندم
حتى واحد في أولادك ما يخدم
ياعباد الدرهم
راه عملك في دفتر مزمم
غدا كدير قدام الحاكم
اللي عارف اسرارك وبها عالم
راه قضاء الله ما يظلم
بظلمك شحال من جيل تحطم
بالله عليك واش انت مسلم
ياعباد الدرهم
شحال وانت تظلم
احزم راسك وخمم
وبعد من الفساد
قبل ما يجي الوقت اللي تندم
💰💰💰
ياعباد الدرهم
كتبيع بلادك للفاسد
وگاع ما تحشم
طلعتي الشفار
وهبطتي العالم
كيفاش بغيتي البلاد تتقدم
وانت غير مدرم
كتبيع شرفك بمائة درهم
هادشي راه يألم
الوضع زاد تأزم
ياعباد الدرهم
كتنجح الفاسد
خمس سنين عليك يزطم
وفي خيرات البلاد يقسم
وعليك يدردك ويتنغم
وانت عيش في الهم
واولادك يبكيو الدم
ياعباد الدرهم
نهايتك يلفوك في اكفن
وفي حفرة تتردم
مجدوب الحرف : بلشقر محمد.
تعليقات
إرسال تعليق