بقلم الشاعر ✍️✍️ بلشقر محمد ✍️✍️ حرب القوافي ✍️✍️
✍️ حرب القوافي ✍️
كتبت قصايد
على الظلم والفساد
قريتها على الأحباب والأصحاب
قليل فيهم اللي فرز الحروف
وقال كلام زين
والباقي ما تسمع منه غير
العجب هذا راه تسطى
الله يستر ظهرهم
عواج بالحنيان والخوف
الجنوية في عنقه تنحر
ماد عنقه واستلم بحال الخروف
فمه تكمم وما قادر يهضر
وراه بزاف على هذ الصبر
انسان مضيوم وما يفكر
حياته كلها مدمر
عايش عيشة القهر
وما قادر ينتافض ويعبر
يمكن كيتسنى يتسالى العمر
ويلفوه في كتانة بيضة
ويحشيوه في القبر
*******
الإنسان حياته كلها مذلول
والا نصحتيه يرجعك مهبول
تأملت حالته
ورصدت ليه كلام معسول
باش يتصلح حاله وما يبقاش مذلول
كلام كله ألغاز منظوم
كله قوافي خاص غير يعرف معناه
ويتخلص من شر اللي أذاه
هذاك الحاكم اللي خيب رجاه
ما بغى يخاف الله
ويرجع الحق لمولاه
سرق كلشي وداه
خلى غير الفتات وراه
والمزلوط ديما يصفق ويدعي معاه
الله يلعن اللي رباه
اللعنة ديما تبعاه
ما خاف الله ما وقر خاه
نطلب من الله يتولاه
هو وهذوك الأشرار اللي معاه
*******
هذا كلامي وانا مولاه
كلام كله قوافي
حرب وعوافي
لهذك اللي ما صافي
ما بغى يتوب ويرجع لطريق الله
مجدوب الحرف : بلشقر محمد.
تعليقات
إرسال تعليق